Amanita caesarea / Gorringoa

DESKRIBAPENA:
Sortzean hegazti-arrautza ematen du, bolba edo kosko batean sartua. Irekitzen denean bere txapel gorri laranjakara eta haragitsua erakusten du. Xaflak horiak dira, estu-estu kokatuak eta oinetik libre. Oin zilindrikoa, horikara, goiko aldean eraztuna eskegia daukala. Haragi zuria, itxia, usain suabe eta atseginekoa. Zapore gozoa, intxaurra gogorarazten du.
HABITATA:
Soilgune eguzkitsuak eta hegoalderantz orientaturiko eremuak, hostozabalen basoetan: haritza, artea, pagoa, gaztainondoa. Talde txikietan ateratzen da.
SUKALDEA:
Kalitate gastronomiko handieneko onddotzat hartzen da. Bikaina da gordina, entsaladan, xafla meheetan moztua.
KONTSERBAZIOA:
Freskoa dagoela, oso egokia. Ozpinetan edo oliotan, ez da egokia. Lehorrean oso egokia.